Wait for the player to load, then click play to listen while you read.

Kchizaa’aazhigwaba kaawiin dash wiigwa waasa maanpii. Bezhik giiyenh gwiizenhs giindaadizi. Jiibwa maset dash gwa, giimnajigaaza nii’ii giiyenh noozwin manidookewin giiyaanaawaa. Nii’ii dash giiyenh giizhinkaajigaaza “Wiigwaas” Giimiigowegwazi dash giiyenh maaba Wiigwaas wiinaadimoowat wiijimaadiziin. Kaawiin etaa Oosan giinaadimoowaasiin gewsenit miinawa giigongkenit, miinawa Gashan miinkenit miinawa ktigenit, gekaajin ge giinaadimoowaan kaawiin etaa enjibaat, gaataayiinh ge endaajik, giinaadimoowaan jiimaankenit miinawa zhigewat.

Maanda dash pii enintaawgit aabidek gii’omiigaaza mii dash giinbwat. Wiikaanenhan dash giibiingoon, mii dash giibigidenjigaazat. Waabshki pshkwegin giiwiikwepijigaaza. Gidaaki zaagiji odenaang giibigidenmigaaza. We dash enimnookimik mii giiyenh mtigoonhs giibizaakiit zhe. Mii dash epiijigit maaba mtig mii giiyenh maaba Wiigwaas Oosan giiaapwet. Giiyaabi dash gwa giiyenh maaba Wiigwaas daaninaadimaage giizhiaapwe maaba Wiigwaas Oosan.

Maanda nimnookimik maada ndomtigwaabo gda’aabijitoonaawa ziiwaagimide wiizhitooyik. Miinawa dash maanda ndonigekim gda’aabijitoonaawa nakaazwinan miinawa naaganan wiizhitooyik waanjiwiisiniyik, miinawa jiimaanan wiizhitooyik. , daabaagaanak miinawa wiigwaaman ge. Shkwade ge gdazhitoonaawa wiigiizhoozyik miinawa wiijiibaakweyik. Waa’aach dash gwa giininbwat maaba Wiigwaas giiyaabe gwa giinaadimoowaan bimaadizijik.

English Translation - click here